Ko ngā moutere o Rēkohu (Wharekauri) ngā moutere whakamutunga o Te Wai Nui (Pacific) kia kitea e te tangata – tērā pea nō te tau 1400 AD tae atu ai te tangata ki reira mai i Aotearoa. Ko tō rātou ara moana, ka eke i te paenga hau (downwind) ki ngā moana pukepuke, kia tae ki tētahi wāhi ririki noa i te moana nui. Ka uaua anō te hoki ki Aotearoa mai i Rēkohu. E tohu ana te rerekē o ngā mahi toi me ngā tikanga o ngā Moriori ki ērā o te Māori ki te mea, i motu noa atu ō rātou hononga ki Aotearoa. Ka kore ngā waka pērā i ngā waka i Aotearoa i te mea kāore he rākau nui ki Rēkohu. Waihangatia kētia e ngā Moriori ngā momo waka mōkihi mā te kākaho me te pōhā. Kāore e tawhiti te haere o ēnei momo waka – e 50 km pea ki waho. Puta ai rātou ki te patu kekeno (seal), ki te hopu pākirikiri.