He kōrero whakarapopoto
Te hōkakatanga i te ao Māori taketake
He take kōrerorero noa te mahi ai i te ao Māori. He nui ngā kōrero me ngā waiata e pā ai ki te ai me te aroha, tae atu ki ērā e pā ana ki te moe o te hunga takatāpui.
Hai ngā whakairo kitea ai te ure tāne me te tara wahine tae atu ki te mahi onioni.
Te hōkakatanga o mua
I te taenga mai o Tauiwi ka kite rātou i te rerekē o te whakaaro a te Māori ki tēnei mea te ai. Arā, he maha ngā hoa wāhine o te rangatira Māori, ā, ka ai noa atu i mua i te moe taumau. Tērā ngā rangahau ō nāianei he mea whakaae te moe takatāpui.
Ngā aweawe whakatauiwi
Nō te taunga mai o te whakaaro Pākehā ka panoni ngā whanonga e pā ana ki te ai. He rite tonu te wā ka tapahia ngā ure i ngā whakairo, ā, ka tangohia rānei ngā wāhanga ai i roto i ngā kōrero tuku iho.
Te hōkakatanga ō mohoa
I ēnei rā e tūngou ana te iwi Māori me te hapori nui tonu ki te āhua kanorau o te hōkakatanga. I te tau ruamano ka whakahaere te Tūmahi Hōkakatanga Māori o te Whare Wānanga o Tāmaki-makaurau i tētahi rangahau mō ngā whanonga ai i waenga i te Māori. Ka mutu he nui te hunga takatāpui wahine mai tāne mai kua kapo ake i te kupu takatāpui hei whakamahukitanga mō rātou anō i roto i te ao Māori, me te ao whānui.