Kōrero: Ranginui

Nō te wehenga o Ranginui rāua ko Papatūānuku, ka tīaho te māramatanga ki te ao. Nā Māui i tāmi te rere kāhaki o Te Rā i te rangi. Hei ngā pō ka puta a Rona, i autōia e te marama ki tōna taha. Koinei ētahi o te whānau mārama kei roto katoa i a Ranginui.

He kōrero nā Rāwiri Taonui
Te āhua nui: Ka wehe a Tāne i te rangi me te whenua

He korero whakarapopoto

Ngā whakaahua me ngā rauemi katoa o tēnei kōrero

Ngā kōrero tuku iho mō te orokohanga o te ao

Ki tā te Māori titiro, ko Ranginui te matua e tū iho nei. I te hangatanga o te ao, e tauawhi ana a Rangi rāua ko Papatūānuku. Kīhai ā rāua tamariki i rata kia noho ki waenganui i a rāua, nā tā rātou kōpipiri, pōuri. Whāia, ka takoto a Tāne ka pana i ōna waewae, ka mawehe a Rangi rāua ko Papa. Whai muri ka tokona e Tāne he pou kia tūturu ai te wehe i a rāua.

Kotahi tekau, tekau-mā-rua rānei ngā rangi tūhāhā. Ka kake a Tāne ki te tihi o ngā rangi kia tiki i ngā kete o te wānanga hei tuku ki te tangata.

Ngā pūrākau i Te Moananui-a-Kiwa

Kei tēnā iwi, kei tēnā iwi o Te Moananui-a-Kiwa ā rātou ake kōrero ka rite ki ngā kōrero a te Māori mō Ranginui rāua ko Papatūānuku. Ko te kōrero a ngā iwi o Rarotonga, i hangaia te ao i te kaponga a Varima-te-takere i a Ātea i tōna taha. Ka hanga nui haere a Ātea, ka auahatia e ia ngā rangi. Whāia, ka moe ia i a Paparoa-i-te-itinga, te whāea o te whenua.

Te whānau mārama

Ko te ingoa o te Māori mō te huinga o te rā, te marama, ngā aorangi, ngā whetū, ngā kāhui whetū, ko te whānau mārama. Ko Tamanui-te-rā te atua nui o te whānau mārama. Tērā te wā he tere rawa tana rere i te rangi, kāore i whai wā ngā tāngata ki te okioki, ki te mahi i ngā mahi. Nā Māui rawa a ia i herehere kia āta haere. He pānga nui tō te marama ki te wahine me te whakawhānau. He nui ngā kōrero mō ngā hīkoitanga a ngā aorangi me ngā whetū. Ka puta te kōtiritiri, hei tohu i te matenga o tētahi tangata whai mana.

Me pēnei te tohu i te whārangi:

Rāwiri Taonui, 'Ranginui', Te Ara - the Encyclopedia of New Zealand, http://www.TeAra.govt.nz/mi/ranginui (accessed 19 March 2024)

He kōrero nā Rāwiri Taonui, i tāngia i te 12 o Hune 2006