Kōrero: Ngāti Kahungunu

Whārangi 5. Te taunga o Ngāti Kahungunu

Ngā whakaahua

Te whakapākūhātanga o te tamāhine a Kahungunu

Ka noho a Kahungunu rāua ko Rongomaiwahine ki Maunga-a-Kāhia (Maungakāhia), te pā i whakatūria e Kahungunu ki Nukutaurua. Tokorima ā rāua tamariki: ko Kahukuranui (he tama) rātou ko Rongomaipāpā (he tamāhine), ko Tamatea-kōtā (he tama), ko Māhakinui (he tama), ko Tauheikurī (he tamāhine).

Kotahi anake te whakaekenga o Maungakāhia. Tērā tētahi wā ka whakatika a Tūtāmure, a Tamataipūnoa (ngā tama a Haumanga, te uri o Kahungunu) me ā raua toa e 500 te rahi mai i Ōpōtiki ki Te Māhia. He pā ikeike, he pā kaha a Maungakāhia, ahakoa tērā, ka whakapaeangatia te pā e Tūtāmure rāua ko Tamataipūnoa. Nō te kitenga kei te kino te pakanga, ka tonoa e Kahungunu tana tamāhine mātāmuri a Tauheikurī kia mōhio ai ko wai e taki ana i te taua. Ka tū a Tūtāmure ka kī:

Ranga ranga te muri, ka tutū te ngaru o te moana ko au tenei ko Tūtāmure.

Hei reira ka mōhio a Kahungunu ko te tama a tōna huānga tērā. Ka tonoa e ia a Tauheikurī hei wahine mā Tūtāmure. I te mea kīhai ia i mōhio ko wai a Tūtāmure, ka tūturi a Tauheikurī ki mua kē i te mea pūrotu, i a Tamataipūnoa, ka tukuna te meremere, a Titingāpua ki a ia. Nō konei, ka haere a Tūtāmure kia tiro i tōna āhua i tetahi hōpua wai kei te ākau kei mua o Maungakāhia, ka mōhio ia, he pūrotu ake tana teina i a ia. Mai i taua wā kua mōhiotia taua hōpua wai ko Te Wai Whakaata a Tūtāmure. Ka tohu a Tūtāmure ki tana teina kia whakaaehia ngā koha – te meremere me te whakapākūhātanga ki a Tauheikurī. Nā wai ā, ka haere a Tauheikurī rāua ko Tamataipūnoa ki te rohe o Tūranga-nui-a-Kiwa noho ai. Tokorua ā rāua tamariki, ko Tawhiwhi rāua ko Māhaki. Ka hua ake ko Māhaki te tipuna o Te Aitanga a Māhaki.

Ko Kōtore, te rangatira o Ōmaruhakeke

Ko te pā o Ōmaruhakeke kei tua tata o Marumaru i whakaeketia e tētahi taua nō Te Kaha. Ko Apanui te rangatira. Ka hinga te pā. I mua o tōna patunga, ka umere a Kōtore te rangatira o te pā, ‘E hoa, ko te weriweri ai ka takoto ai au ki roto ki tō puku!’ Ka pātai a Apanui kei hea he tāne pūrotu ake i a ia, ka kite a Kōtore i āna ake tama, a Umurau rāua ko Tamahikawai e arahina ana ki a Apanui kia patua. Ka whakautu a Kōtore, ‘Arā, kia pērā me ngā tukemata nui o Kahungunu e arahina mai rā.’ Nō muri mai ka mōhiotia ai a Tapuwae, te mokopuna a Kōtore, rātou ko tōna wahine me ōna uri ko Ngā Tukemata nui o Kahungunu. Nō muri mai ka ūhia te ingoa ki ngā uri katoa o Kahungunu.

Te kupenga a Te Huki

Ko Te Huki e ora ana e ono whakapaparanga i muri mai i a Kahungunu rāua ko Rongomaiwahine. I ōna rā, koia te rangatira nui o te whenua kei waenganui o Waihua me Mōhaka. Nā roto i āna mārenatanga me tana whakanoho i ana tamariki ki ngā wāhi atu i Tūranganui-a-Kiwa ki Wairarapa, ka tū āna hononga tangata wā roa i kīia ko Te Kupenga a Te Huki.

Tokotoru ngā wāhine a Te Huki arā ko:

  • Te Rangitohumare, he mokopuna nā Te Whatiāpiti (ko Te Whatuiāpiti rānei) o Heretaunga
  • Te Ropuhina, he puhi nō Nūhaka, kei te taha raki o te rohe o Ngāti Kahungunu
  • Rewanga, te tamāhine a Te Aringa i Waho, te rangatira o te pā o Tītīrangi ki Tūranganui-a-Kiwa.

Noho tonu ai ngā wāhine a Te Huki ki waenganui i ō rātou ake iwi, he wā anō ka huri haere ia kia kite i tēnā, i tēnā o rātou. Ka moe ana tamariki i ngā tamariki a ngā rangatira whai kaha, me te aha, ko ō rātou uri, ko ngā whānau matua o Whāngārā-Tūranganui, o Te Māhia, o Nūhaka, o Te Wairoa, o Heretaunga, o Pōrangahau.

Me pēnei te tohu i te whārangi:

Mere Whaanga, 'Ngāti Kahungunu - Te taunga o Ngāti Kahungunu', Te Ara - the Encyclopedia of New Zealand, http://www.TeAra.govt.nz/mi/ngati-kahungunu/page-5 (accessed 26 June 2019)

Story by Mere Whaanga, published 8 Feb 2005, updated 3 Mar 2017