Kōrero: Māori rugby – whutupaoro

I te haere a Āwherika ki te Tonga i Aotearoa i te tau 1921, ka ara mai te tautohetohe i muri i te tākaro a te tīma Piringipaka me te tīma Māori o Aotearoa. I mea te karere ā-waea i tukua e te kairipoata o Āwherika ki te Tonga, e Charles Blackett, kāore te hunga o Āwherika ki te Tonga i hiahia tākaro ki ngā Māori, ka mutu, he whakarihariha ki a rātou ngā mahi tautoko a ngā Pākehā o Aotearoa i te tīma Māori. I te tīmatanga, arā, i mua atu i te mōhiotanga o te karere ā-waea, i whakapāha a Ned Parata ki te tīma o Āwherika ki te Tonga nā te āhua whakararuraru i hua mai i ētahi o ngā kaimātakitaki. Te mōhiotanga o Kiwi Amohau rāua ko Tai Mitchell o Te Arawa ki ngā karere, ka tukua e rāua he karere ā-waea ki te kaiwhakahaere o te tīma Piringipaka, ki a H. C. Bennett, me te amuamu mō te whakahīhī o te hunga Piringipaka, inā hoki, he tīma tēnei i pōhiritia nuitia e Te Arawa i Rotorua. Ka whakautua e Bennett kia kaua rātou e aro ki ngā harihari kōrero, ā, ehara te karere ā-waea i te whakaaro o te tīma. Ka rata a Parata ki te kōrero a Bennett, engari ka whakatōngā tonu a Amohau rāua ko Mitchell, me te kī ake kia pāoho whānuitia rā anō tēnā whakautu āna, kātahi rāua ka mihi ki a ia.