Kōrero: Te Waonui a Tāne

Whārangi 4. Ngā pou me ngā tumu

Ngā whakaahua me ngā rauemi katoa o tēnei kōrero

Pou

He mea hanga te pou i te rākau. Waihoki, āta whakatūria ai te pou ki tētahi wāhi ake hei tohu. He tauira; ko te pou rāhui ka tohu ki tētahi whenua kua rāhuitia, tētahi whenua kua āta wehea. He whakamārama anō mō te wāhi i whakatūria taua pou, tae rawa atu ki te momo rākau i tāraia.

Ka whakaritea ētahi tāngata ki te pou, inarā, he pērā i te pou, kua tāngia rātou ki te moko whakairo, kua whakaritea he mahi nui hei whakatutuki mā rātou. Kāore i kore ka whai tūranga taua tangata ki roto i ngā mahi a te whānau, a te iwi, ka taka ki runga ki ōna pakihiwi ngā taumahatanga, pērā ki te pou.

Te tumu

He momo pou anō te tumu; koirā te tumu o te rākau, hāunga te korenga o te rākau. Kāore te tumu e tuaina, e nekehia rāneitia ki wāhi kē. Nā te whai pakiaka ki roto i te whenua, ka herea ngā waka ki ngā tumu. Whāia, ka ūhia te kupu tumu mō te kāhui ariki, nā tō rātou noho pūmau ki ō rātou ake whenua, nā tō rātou tū kaha ahakoa he aha ngā uaua o te wā; inā:

Ko te tumu herenga waka.
Me pēnei te tohu i te whārangi:

Te Ahukaramū Charles Royal, 'Te Waonui a Tāne - Ngā pou me ngā tumu', Te Ara - the Encyclopedia of New Zealand, http://www.TeAra.govt.nz/mi/te-waonui-a-tane/page-4 (accessed 23 November 2019)

He kōrero nā Te Ahukaramū Charles Royal, i tāngia i te 24 Sep 2007