Kāore ngā pukapuka o Te Tiriti o Waitangi, e mau ana i ngā waitohu o ngā rangatira me ētahi au, i tino manaakitia i roto i ngā tau. I te tau 1842 i whakarauoratia ngā pukapuka i te ahi i roto i ngā whare kāwanatanga karukaru i Tāmakimakaurau. I muri i te ahi, i tāpirihia, ā, ka whakaputua ki tētahi pouaka haumaru i roto i te Tari o te Hekeretari Koroniara. I muri iho i whakawhitia ki Te Whanganui-a-Tara, te wāhi i kitea ai e te kaihītori, e Thomas Hocken i roto i te papararo o ngā Whare Kāwanatanga i te tau 1908. Ko te raru, kua kainga e ngā kiore nui. Nā te whakamaimoa whāomoomo kino me ngā whakaaturanga kūare i whakakino anō i ngā pukapuka.

Ināianei, kei te tiakina ngā hīti e iwa e mau tonu ana e Te Rua Mahara o te Kāwanatanga. I te tau 1990, i muri i ētahi mahi whāomoomo, i whakaatuhia ngā pukapuka i roto i te Rūma Ture Kāwanatanga i Te Rua Mahara o te Kāwanatanga i Te Whanganui-a-Tara. I huakina tēnei e Jim Bolger hei wāhanga o te whakanui i te huri tau o Waitangi.

I te tau 2017, i nekehia ngā pukapuka mai i te whare o Te Rua Mahara o Aotearoa ki te whare o Te Puna Mātauranga o Aotearoa i Te Whanganui-a-Tara. Kei te whakaatuahia i roto i tētahi rūma motuhake e kīia ana ko He Tohu. E hāngai ana te hoahoa o te rūma ki tētahi waka huia (he pouaka taonga e whakamahia ana e ngāi Māori ki te whakaputu i ngā taonga). He whakahaere paemahana, tūrama hoki tā He Tohu ki te whakauka i ngā pukapuka me te whakatūturu ka haumaru tonu i te wā e whakaatuhia ana. E whakaatuhia ana hoki he mōhiohio ki te āwhina i ngā manuhiri kia mārama ki te hītori o te tiriti.

Kei roto i He Tohu, He Whakaputanga o 1835 me te petihana pōti o 1893, ētahi atu pukapuka taketake. I roto i ngā tau tuatahi e rima o te tuwheratanga o He Tohu, ko te whakatau tata 100,000 ngā tāngata, tae atu ki ngā tamariki kura 20,000, i toro atu ki te whakaaturanga.