He whakairo tēnei nā Cliff Whiting o Te Whānau-a-Apanui; e whakaatu ana i te whakapono a te Māori mō te ao i piri ai a Rangi ki a Papatūānuku. Nā te piri, kāore i uru te mārama ki te ao. Ka whakamātau ā rāua tamariki ki te wehe i a rāua, engari ko Tāne Mahuta te toa o rātou ki tēnei mahi. Kei te whakairo nei e huri kōaro ana ia, ka mutu koia te whakaihuwaka i nunui ake ai tōna āhua. Atu i te mauī ko Tangaroa (te atua o te moana), ko Haumia (te atua o  ngā otaota), ko Rongo (te atua o ngā kai hauhake), ko Tūmatauenga (te atua o te riri), ko Tāne Mahuta, ko Tāwhirimātea (te atua o ngā hau me te huarere). I whakahē a Tāwhirimātea i te wehenga o Rangi rāua ko Papa, nā reira noho wehe ia i ērā o ōna tuākana. I roto i ngā kōrero mō te pakanga a ngā tuākana me ngā tāina ka kitea te tūhonotanga ki ngā kawa tapu, noa hoki ka kawea i ngā mahi kai a te Māori o mua.