He minita Mihinare a Rēweti Kōhere nō Ngāti Porou; he kairipoata, he ētita nūpepa hoki, i tāia e ia ētahi kōrero wero hinengaro ki roto i te maha o ngā nūpepa. Kei tētahi o ana tuhinga, ‘Kei hea a Hawaiki’, he mea tā ki te nūpepa a Te Kōpara i te tau 1920, ka āta tirohia e ia ngā wāhi tērā pea kei reira a Hawaiki. Kei roto i tēnei kōrero te whakamārama tērā pea he maha ngā Hawaiki:

Kua ki ake au kahore i kotahi te Hawaiki. He maha ngā moutere o te moana kei te nohoia e te Māori arā e ngā iwi e kīia nei e te Pākehā he ‘Polynesian’ – ko Hāmoa, ko Tahiti, ko Tonga, Rarotonga, ko Paumotu, ko Nukuhiwa, ko Te Pito-te-Henua (Easter Island), ko Aotearoa, ko Te Waipounamu me ētahi atu moutere ririki. Nō te Māori katoa ēnei motu, ā, kotahi anō te reo. Nā, ko te kī a ngā iwi katoa o ēnei motu ko Hawaiki tō rātou mātāpuna kei te Rā-tō. Kua kitea ko Hawa ara ko ‘Java’ tetahi o nga Hawaiki. I noho ngā tīpuna o te Māori ki ‘Java’ ā, i heke mai i reira ka noho ki Whītī, i Whītī ka hōrapa ki ngā wāhi katoa o Te Moana-nui-a-Kiwa. Kua rapua anō e te Pākehā, ā, kua kitea i heke mai te Māori i Īnia ka noho ki Hawa. He iwi kei Īnia e kiia ana he Maoli, he Mauri. Engari kua tino tūturu te whakaaro o ngā Pākehā mātau ko te mātāpuna o te Māori kei Ūropi arā, kei Caucasus; ko te take mai o te Pākehā o te Māori kotahi anō he ‘Aryan’. I roto i ngā tau maha i heke te Māori ka pā ki ngā Hainamana, ki ngā mangumangu i tō rātou huarahi, nā konei i Hainamana (Mongolia) ai, i mangumangu ai te āhua o ētahi Māori. Ko ētahi Māori he kiri-tea, he tūrehu, he korako, he urukehu; ko ēnei ngā Māori i mau tonu te pākehātanga.