I waenga i ētahi atu whetū, ētahi atu kāhui whetū e iri mai ana i te rangi takurua, ka kitea anō a Matariki rāua ko Puanga, ka kīia ko Puaka e Ngāi Tahu o Te Waipounamu. Ka kitea hoki i te rangi takurua a Takurua tonu, a Tautoru , me Taumata-kuku.

Me pēhea te rapu i a Matariki

Hāhaka ana te iri mai o Matariki ki te huapae i te uru-mā-raki o te rangi. Me titiro ki reira i waenga i te 5.30 me te 6.30 i te ata.

1. Tuatahi, rapua ko Tautoru (ngā whetū rongonui e toru kei te pito whakararo o ‘te kōhua’, o Orion’s belt rānei).

2. E kitea ai a Puanga, titiro ki runga ake o te kōhua kia kitea te whetū taiahoaho – ko Puanga tērā.

3. E kitea ai a Matariki, titiro ki te mauī o Tautoru, rapua te whetū whero taiahoaho, a Taumata-kuku. Me whai te karu i tētahi rārangi pohewa atu i a Tautoru,  rere atu ki a Taumata-kuku, ka haere tonu ki tētahi kāhui whetū. Ko Matariki taua kāhui. Ki te pai o karu ka kitea tēnā me tēnā whetū. Ki te rehurehu te āhua, me titiro ki runga paku atu, ki raro paku iho, kua mārama ake ngā whetū.  

I tēnei ataata a Te Papa, ka whakaatungia he ara kē e kitea ai a Matariki, ka tīmata ake i te kimi i te Taki-o-Autahi.