Ko Parapara te wāhi noho o Kaiwhakaruaki te taniwha kaitangata.

Ko Kaiwhakaruaki tētahi taniwha kai tangata. Ka noho ia ki Parapara i Mōhua (Golden Bay). Wehi katoa ngā tāngata haere ai i ngā huarahi, i ngā ara moana ka tata ki Parapara. Kitea ana e Kaiwhakaruaki tētahi tira tangata, kainga katoatia. Ka hōhā ngā rangatira a Potoru rāua ko Koheta ki ēnei mahi āna, ka taka whakaaro rāua me pēhea e taea te taniwha rā te patu.

Ka topea e Potoru tētahi pohutukawa tapu, koia anake te rākau e tū ana i te whanga. Kātahi ka mahia e ana toa e 340 ētahi patu mai i ōna peka me tōna tinana. Ka karakia rātou, ka whakaharatau rātou, ka wehea kia toru ngā wāhanga o tō rātou taua – ko te matua e 140 toa te rahi me ngā wehenga e rua, e 100 toa ki ia wehenga, ka huna kei ngā tahataha.

Ka tīmata te whawhai i te putanga atu o tētahi toa ki te whakawai i te taniwha kia puta i tōna rua mā te hoatu hōrua ki a ia. Kātahi ka whakawaia e te toa rā te taniwha kia kuhu ki ngā wai pāpaku. I reira pakanga ai rāua; ahakoa te māia o te toa rā, ka patua, ka kainga ia.

Nā te arotahi o te taniwha ki tana whawhai ki te toa rā, kāore ia i kite i ngā toa a Potoru e kōkiri ana i ngā taha. I te mutunga ka patua te taniwha.

Ahakoa pōhēhē tonu te kaipanui ki ētahi wāhanga o te kōrero nei, e rua ngā take e nui ai te kōrero. Tērā pea nā ngā kōrero mō te taniwha ētahi atu iwi i whakamataku kia kaua e haere ki te takiwā rā ki te tango i ngā rawa o reira pēnei i ngā uku tae.

I tua atu, he nui tēnei kōrero. Kei ngā moutere o Te Moana-nui-a-Kiwa te kōrero mō ‘Aifa’arua’i’, te taniwha patu i ngā tāngata haere i ngā moutere o Parapara, o Ta’a’a, o Motue’a, o Ara’ura. I tīkina aua kōrero ki tāwāhi, ka whakanōhia ki tēnei takiwā, inarā kei te whakahuatia tonutia aua ingoa ki Te Tai Poutini i ēnei rā tonu – a Parapara, a Tākaka, a Motueka me Arahura.