Ko Raukawa te tamaiti a Tūrongo rāua ko Māhinaarangi. He kōrero tino rongonui ki te ao Māori te kōrero mō te whaiāipotanga a Tūrongo rāua ko Māhinaarangi. I te whai a Tūrongo i a ia, i pania e Māhinaarangi te hinu raukawa ki tōna kiri.

Te ingoa o Raukawa – he kōrero aroha mō Tūrongo rāua ko Māhinaarangi:

Ko Tūrongo rāua ko Māhinaarangi ngā pakeke o Raukawa. Otirā, ko te kōrero mō tō rāua mate kanehe ki a rāua tētahi o ngā kōrero nui o te ao Māori. Hei tamariki a Tūrongo rāua ko Whatihua mā Tāwhao, he rangatira nō Tainui. Ko tō rātou kāinga kei Kāwhia. I runga i nga āhuatanga o tō rāua tipu, ka pakeke rāua hei hoa tātāwhāinga. I te pakeketanga o Tūrongo ka haere ia ki Pātea ki te taha uru o Taranaki; i reira ka moe i a Ruapūtahanga, te wahine pūrotu o te waka Aotea. He wahine urukehu a Ruapūtahanga, i puta whānui te rongo mō tōna ātaahua. I muri mai i tō rāua whakaipotanga, ka whakaaetia kia pūmau te moe a Ruapūtahanga rāua ko Tūrongo. Ka hoki a Tūrongo ki Kāwhia ki te hanga whare mō tōna hoa wahine. I te rongotanga ake o Whatihua mō tēnei ka tipu te pūhaehae mō Tūrongo, ka ngana a ia kia riro mai a Ruapūtahanga hei hoa wahine mōna. I a Tūrongo e hanga ana i tōna whare, ka tae atu a Whatihua me tana kī atu ki a Tūrongo me whakapoto te tāhū o tōna whare, he roa rawa (nā tēnei ka poto te whare). I tua atu ka kī ia ki a Tūrongo kia whakakīia tōna pātaka ki ngā kūmara paku noa i te mea, e ai ki a Whatihua, ko ērā ngā kūmara pai rawa ki a Ruapūtahanga. I muri mai, ka hoki a Tūrongo ki te hanga i tōna whare mīharo rawa atu e riro ai a Ruapūtahanga māna.

Taro ake, ka tae atu a Ruapūtahanga me tana ope ki te kāinga o Tūrongo. Ka tumeke ia i te ririki o te whare o Tūrongo me te pakupaku o ngā kūmara i horahia hei kai mā ratou. I konei ka tae atu a Whatihua me tana tono kia haere te manuhiri ki tōna kāinga i te mea he nui tōna whare, ka uru katoa atu rātou ki roto.

Patua a Tūrongo e te whakamā, tē taea e ia te manaaki i āna manuhiri me tō rātou puhi a Ruapūtahanga. Nō muri i tēnei ka wehe atu a Tūrongo i Kāwhia kia ahu whakaterāwhiti ki ngā whenua o te Tai Rāwhiti. Nāwai, ka tae ia ki te takiwā o Kahotea, he wāhi e makuru ana te tipu o te raukawa.

I a ia i reira, ka puta te rongo mō tana tohungatanga ki te hopu manu me te wāwāhi poro rākau hei hanga whare. Mīharo ana te hau kāinga, tae atu ki ngā pakeke o Māhinaarangi, a Angiangi rāua ko Tūaka. Ka mea atu ōna pakeke ki a Māhinaarangi kia whakaarohia a Tūrongo hei hoa tāne mōna. Whakaae atu ana a Māhinaarangi, ka taka whakaaro me pēhea e riro mai ai e ia te tangata rongonui nei a Tūrongo hei hoa tāne mōna.

I taua wā i te hanga a Tūrongo i tētahi whare. Hei ngā ahiahi, kia mutu ana mahi, kua hoki ia mā te huarahi o te ngahere ki te whare e noho rā ia. Ka mōhio a Māhinaarangi mō tēnei, ka haere ia ki te ngahere ki reira tatari ai kia hipa a Tūrongo. Ka tūtaki ia ki a Tūrongo, nāwai ā, ka moe rāua. Ahakoa tā rāua whai i a rāua, kāore a Māhinaarangi i whāki ko wai ia, me te mea anō, hei ngā pō rawa rāua tūtaki ai. Kotahi anake te tohu e mōhio ai a Tūrongo i tana ipo, arā ko te kakara o te hinu raukawa e mau ana ia.

Ka taka te wā ka huaina e Māhinaarangi ae mārika, koia tonu tērā. Ka pūmau te aroha o Tūrongo mō Māhinaarangi, whakaaetia ana e te katoa kia moe rāua. I reira anō a Tāwhao te matua o Tūrongo, whakaae tonu atu ia. Ka hapū a Māhinaarangi, ka hoki a Tūrongo rāua ko Tāwhao ki Kāwhia ki te whakatū whare. I te hokitanga atu o Tūrongo ki Kāwhia ka nōhia e ia a Rangiātea hei papakāinga, hei wāhi whakatū i tōna whare.

I haere a Māhinaarangi me tōna tira mā te huarahi o Wairoa, o Rotorua, tae rawa ki Waikato. Nō tā rātou taenga ki Ōkoroire, ka whānau mai te tamaiti tāne a Māhinaarangi, ka tapaina ki a Raukawa, te ingoa o te hinu kakara a Māhinaarangi i te wā o tō rāua whaiāipotanga ko Tūrongo.