Kōrero: Ngāi Tūhoe

Ko Maungapōhatu te maunga tapu o Ngāi Tūhoe. I te wā onamata, tērā ētahi wāhine, a Hine-pūkohu-rangi rāua ko tana teina a Hine-wai. E ai ki te kōrero, nā Hine-pū-kohurangi a Te Maunga i whakawai kia heke iho i te rangi ki tana taha. Ka moe rāua, ka puta ko Pōtiki, te tipuna o Ngā Pōtiki, tētahi o ngā iwi o Te Urewera i mua i te taenga mai o Mataatua ki Aotearoa. Koinā te take ka kī a Ngāi Tūhoe i tipu ake rātou i tō rātou ao – te wao tapu nui o Te Urewera.