Ngā Rōpū Pāpāho
Tau rawa iho ki ngā tau 1980, nā te karauna katoa ngā rawa pāpāho (reo irirangi, pouaka whakaata) i Aotearoa. He paku noa iho ngā pāhotanga reo Māori i runga reo irirangi mai i te wā o te Pakanga Tuarua o te Ao. Ko te pouaka whakaata, i tōna tīmatatanga, he whaitua reo Pākehā anake i ngā tau 1960. Nā tērā i tino heke ai te mana o te reo Māori me tōna whanaketanga i tēnei ao hou, otirā, nā te puta o ngā niupepa me ngā moheni reo Pākehā, he mea pupuri e ngā ringaringa o te rāngai tūmataiti, i tino hē kē atu.
I tōtika atu te kēreme WAI11 ki ēnei take. I whakamahia ngā kaiwhakahaere rawa pāpāho Karauna ki te tuku i ō rātou taunakitanga mō te korenga o rātou i pāoho ai i te reo taketake mā te hunga hiahia i Aotearoa nei ki te mātakitaki atu, ki te whakarongo atu rānei.
Ko te hua i puta, ko te whakatūranga o ngā reo irirangi Māori, o Whakaata Māori hoki, e pāho tonu nei ki te motu. Kei te whakamahia te reo Māori e te Reo Irirangi o Aotearoa me Te Reo Tātaki i ētahi o ā rātou hōtaka, pānuitanga hoki. Ko te pūtea tautoko mō ngā kaupapa pāho Māori ka whakahaerehia e Te Māngai Pāho, he hinonga karauna. He pūtea tautoko iti hoki tā Irirangi Te Motu New Zealand On Air mō ngā hōtaka reo Pākehā, reo Māori hoki.