Skip to main content
Logo: Te Ara - The Online Encyclopedia of New Zealand. Print all pages now.

Taki, Paora

by Tipene O'Regan

Biography

Nō te whānau a Ngāi Te Rakiāmoa, hapū o Ngāi Tahu a Pāora Taki. Tērā pea i whānau a ia i Te Waipounamu i ngā tau tīmatanga o te rau tau 1800–1899. E ai ki tōna matua, ki a Rakiāmoa rāua ko tōna whaea, ki a Kere, he hononga anō nō rātou ki Te Ātawhiua hapū i roto o Ngā Pākihi-whakatekateka-a-Waitaha (Canterbury) me Ngāti Kurī hapū i roto o Kaikōura.

I akona e Pāora Taki ngā mahi a te toa mau rākau, ā, i haere hoki ia i te taha o te ngārahu nei o Ngāi Tahu, o Tama-i-haranui ki te pakanga, ki te Kaihuānga i tū rā i waenganui i ētahi o ngā hapū o Ngāi Tahu o Waitaha i te tekau tau atu i 1820. Kāore anō kia tino mutu noa te whawhai kaiākiri nei, ka whiua rā a Ngāi Tahu e te tokomaha tonu o ngā marau nunui a te ope taua mau pū a Ngāti Toa o te tau 1828 i raro i a Te Rauparaha. Tuatahi tonu, ka whakaekea e Ngāti Toa a Kaikōura, nō muri tonu mai ko Kaiapoi i te tonga, te wāhi i patua nei a Te Pēhi Kupe me ētahi atu o ngā rangatira o Ngāti Toa i muri i tō rātou urutanga ki roto i te pā ki te hokohoko pounamu. Ko te take i pakanga a Pāora Taki ki a Ngāti Toa nā te here i runga i a ia kia ngakia ai te mate o ōna whanaunga o Ngāti Kurī i hingahinga i Kaikōura. Ā, i roto anō a ia i tētahi pakanga hua kore ki a Ngāti Toa, i te kōkiri ohorere a tērā i runga i te kaipuke, i te Elizabeth i Akaroa i te tau 1830. Ka mau herehere a Tama-i-haranui rātou ko tōna hoa wahine me tā rāua tamāhine i Akaroa, kātahi ka mauria ki te moutere o Kapiti; ka patua kia mate.

Kua taunga rawa kē a Taki i tēnei wā ki te mau rākau, ā, i hau tōna rongo i roto i ngā waitaua rau tipua a Ngāi Tahu ki a Ngāti Toa. I te tau 1833 pea, i roto a ia i te ope taua e ahu whaka-te-raki ana i raro i a Tūtehounuku, i a Tangata Hara me Mākere Te Wharanawhana, ā, i tata mau herehere i a rātou a Te Rauparaha i Kāparatehau (Lake Grassmere). I uru anō a ia ki ngā waitaua o muri mai, arā, o 1834, 1838 me 1839, ā, whiwhi ana a ia i te tohu o te tangata rākau kawa i roto i ēnei pakanga. Nā ēnei ka noho a ia hei hoa piri pono ki ngā amorangi katoa o Ngāi Tahu o tōna wā. Ko Tūhawaiki, ko Taiaroa, ko Karetai, ko Haereroa, me Mākere Te Wharanawhana ētahi o aua tāngata.

I roto i te kaumātuatanga o Taki ka pānuitia whānuitia e ia ngā kōrero o ngā pakanga ki a Ngāti Toa ki tētahi o ngā tamāhine a Teone Taare Tīkao. Ka mutu tonu ngā kōrero e ora tonu ana nā te tangata tonu i aua pakanga i kōrero. Tērā atu ētahi o ngā kōrero nā Tāmihana Te Rauparaha o Ngāti Toa, otirā ko ēnei he rongo kōrero noa iho. He mea whakamīharo te pukapuka ā-ringa a Pāora Taki; te huhua noa o ngā kōrero mō aua pakanga, te mau hoki i a ia o ngā īngoa me ngā mahi a ngā tāngata o Ngāi Tahu me Ngāti Toa, me te taki mai hoki ōna i te pūtake whakaaro i mahi pērā ai rātou ki a rātou. Ahakoa he rākau Pākehā anō i ngā pakanga, ka kitea i taua tuhinga ngā whakaaro tuku iho o te hinengaro Māori e pā ana ki ngā tikanga o te riri.

Ka moe a Pāora Taki i a Te Kohuwai, ka puta he huatahi, ko Wikitōria Ngā Roimata; i mate urikore ia. Nō ngā rā o muri mai ka noho a Taki ki Rāpaki, ko tāna mokopuna ko Wikitōria Mokiho ki te tiaki i a ia.

Ka mahi a Pāora Taki hei āteha mō te Tari Māori mai i te tau 1865 ki te tau pea o 1875. E mau ana i tōna pōtae pere-teitei me te mau haere i tāna taiaha, ka kitea a ia i ētahi wā e noho ana i te taha o tōna hoa, o Wiremu Tānara, (William Donald), kaiwhakawā takiwā o Te Whakaraupō (Lyttelton). Kāore a ia i aro ake ki te āhua noho o Ngāi Tahu i kō ake i ngā tikanga a te rūnanga o Rāpaki. Nāna i whakanoa ngā tapu o Rāpaki kia rangatira ai te iwi, ā, i tono anō a ia kia manaakitia ngā urupā, kia kaua e onokia, e taona rānei he kai i reira. I te tau 1884 ka hainatia e J. W. Stack me Te Tipa (W. B. D. Mantell) tētahi pukapuka tautoko, e whakaatu ana he mōrehu a Pāora Taki nō te kāwai rangatira, he toa whawhai, he toa māia. E kīia ana i mate a Pāora Taki i Rāpaki i te 7 o Tīhema 1897.


Hononga, rauemi nō waho

Ētahi whakaaro puaki, takenga

    Couch, A. Rapaki remembered. Lincoln, 1987

    Taylor, W. A. Lore and history of the South Island Maori. Christchurch, 1952


Me pēnei te tohu i te whārangi:

Tipene O'Regan. 'Taki, Pāora', Dictionary of New Zealand Biography, first published in 1993. Te Ara - the Encyclopedia of New Zealand, https://teara.govt.nz/mi/biographies/2t5/taki-paora (accessed 15 November 2019)