Te Tai – Treaty Settlement Stories

RUA | 2
Tuku rangatira

Ko ēnei rangatira a Apihai Te Kawau me Paora Tūhaere o Ngāti Whātua Ōrākei, he toa ki te whakarite rautaki, he mākohakoha, he pakari mauroa. I ārahina e rāua te hapū i ngā wā o te pai me te uaua, ko tā rāua i ngā wā katoa he whai kia noho te ora mau roa ki te hapū.

Ataata: Whai Maia Trust 1 Ltd

He aha te hau e wawara mai rā?

I te tau 1825 ka patua a Ngāti Whātua e Hongi Hika me ngā iwi o Te Tai Tokerau. Whai muri i tēnei, ka noho a Apihai Te Kawau me tōna rahi ki Waikato tata tonu te tekau tau te roa. Ka hoki mai a Te Kawau me tōna rahi ki Tāmaki, ka whakatū anō i ō rātou kāinga. Ko Karangahape, ka whai ko Māngere me Onehunga. I waenga i te tau 1836 me te 1838 ka whakatakoto māra kai ki Te Rehu, ki Horotiu, ki Maunga Rāhiri, ki Ōkahu anō hoki.

Nō te taenga mai o ngā karere mō te taenga o Hopihana ki te Pēwhairangi, ka hui ngā rangatira o te Kaipara, te Waitematā me ōna takiwā, ko ngā kaiwhakahaere i te hui ko Te Kawau me Whatarangi. Ko te take matua o te hui ko te maungārongo. Ka tae ki tētahi wāhanga o te hui, ka tū a Tītai, tētahi tohunga o te Taoū, ka taki ake i te kupu i homai rā e tētahi atua o te pō ki a ia, mea nei ngā kupu o tana hari.

He aha te hau e wawara, e wawara?
He tiu, he raki, he tiu, he raki
Nāna i ā mai te pūpūtarakihi ki uta
E tīkina e au te kotiu
Koia te pou whakairo ka tū ki Waitematā
I ōku wairangitanga

I te rongohanga o te hari nei e te huihuinga, ka tukuna e rātou he ope ki te Pēwhairangi, ko te irāmutu a Te Kawau, ko Te Reweti te kaiārahi. Ka kī atu rātou ki a Hōpihana he whenua mōna kei Tāmaki i te taha o te iwi o Te Kawau ki ngā wai kānapanapa o te Waitematā.

Ataata: Whai Maia Trust 1 Ltd

Raupatu, mana me te ahikā

I whānau mai a Apihai Te Kawau i te takiwā o te 1780. He uri ia nō te rangatira o Te Taoū, arā, ko Tuperiri. Nā Tuperiri tōna mana i whakatau ki runga o Tāmaki whai muri i te matenga o Kiwi Tāmaki o Te Waiohua i tana matua kēkē i a Wahaakiaki.

I tupu mai a Te Kawau i ngā wā o te riri. I ārahi ia i tōna rahi i ngā wā o te hē, ka noho haumaru atu ia ki Waikato i te āki nui mai a Ngāpuhi i ngā tau o te 1820. Ka whakatūria anōtia te mana o tōna iwi e ia, horapa i Tāmaki. Nō te tau 1837, i te wā o te kōanga, ka whakatōngia e Te Kawau mā he māra kai ki te Waitematā, ka noho atu ki reira mai i te tau whai muri iho.

I raro i te tono a Te Kawau, ka hūnuku mai a Te Wherowhero o Ngāti Mahuta ki Onehunga. Ka tukuna e Te Kawau he whenua ki a ia, He whenua i Remuwera, me Onehunga. He mea hei utu i te manaaki mai a Te Wherowhero i ngā tau i mua mai.

I te tau 1840, ka puta te tono i a Te Kawau ki a Kāwana Hopihana kia whakatū i te tāone matua ki te Waitematā. Ka hainatia e ia te Tiriti o Waitangi i te 20 o Poutūterangi 1840, ā, i te 20 o Whiringa-a-nuku, ka tukuna e ia ki a Hōpihana te whenua e kīia nei i te rā nei ko te pokapū o Tāmaki.

Kāhore noa iho i roa, he nui ngā whenua o Ngāti Whātua Ōrākei kua riro. I ngā tau tuatahi o te 1850, ka kōkiritia e Te Kawau te whakakāhoretanga o ngā hokonga whenua i Tāmaki. I te tau 1873 ka riro mai te taitara mō te paraka 700 eka ki Ōrākei, ka whakapūmautia e Judge Fenton kia kaua rawa e hokona atu. Ka pā ngā taimahatanga ki a Te Kawau me tōna teina a Te Tinana, ka whakaaro rāua me neke ki Rarotonga, hoi, ka noho rāua ki te Kaipara, i runga i ētahi whenua i tukuna e Ōtene Kikokiko, rangatira o te Te Taoū ki a rāua.

Ka mate a Apihai Te Kawau ki Ōngārahu, ka tanumia ki te Kaipara.

Ataata: Whai Maia Trust 1 Ltd

Te tuakiritanga me te mana motuhake

I whānau mai a Tūhaere i te tau 1825, ka iriiritia i te tau 1840 ki tōna ingoa karaitiana, a Pāora (Paul). Ko ia te piki tūranga o tōna matua kēkē a Apihai Te Kawau i tōna matenga, hei rangatira mō te Taoū, Ngā Oho me Te Uringutu. I te wā o Pāora Tūhaere ka mōhiotia ēnei hapū ko Ngāti Whātua Ōrākei.

E rongonui ana a Tūhaere mō te whakatū me te whakahaere i te hui ki Kohimarama i te tau 1860. I whakahaere hoki ia i te paremata o Te Kotahitanga ki Ōkahu i te tau 1879. Ka hui tahi mai ngā rangatira mai i Aotearoa whānui ki te kōrero mō te Mana Māori, ngā nawe tiriti, te rironga o te whenua, te ture, me te korenga o te Māori i whakanohotia ki ngā kaunihera me te pāremata. I maha ngā tono a Tūhaere kia whai wāhi atu te Māori ki ngā waihangatanga o te ture, hoi, i whakakāhoretia ēnei tono āna.

I kitea e Tūhaere ngā tini panonitanga i tōna oranga, te rironga o ngā whenua, o ngā moana o Ngāti Whātua Ōrākei ki te Karauna me tauiwi. I kaha tana wero i te Karauna kia ū ki te whakaaetanga o te tau 1873, arā, kia noho pūmau ai ngā toenga whenua o Ngāti Whātua Ōrākei ki ōna ringaringa. Ko ngā tau 80 i whai ake, he tau pōuri nui mō tōna iwi, i riro te katoa o ngā whenua me te kaha pā mai o te whakawaimehatanga.

I te matenga o Pāora Tūhaere i te Poutūterangi o te tau 1892, ka tangihia nuitia ia e te tini, e te mano, e Tāwhiao anō hoki. Ko ōna pūkenga he kōtuitui, he kaitakawaenga, he kaiauaha, he kaiwhakahaere, he kaihohou i te rongo, he hoa pūmau hoki nō te Pākeha.

Ataata: Whai Maia Trust 1 Ltd

Tuku Rangatira

E noho pūmau ana a Ngāti Whātua Ōrākei ki tōna tūranga ahi kā, tūranga mana whenua. Me te tuku i te manaakitanga ki ngā tini tāngata e ū mai nei ki ōna whenua. I tīmata i a Apihai Te Kawau me tana pōwhiri ki a Hopihana i te tau 1840, me te tuku whenua ki a ia. E haere tonu ana ēnei hāpaitanga mātāpono, hāpaitanga manaakitanga ki te hapori whānui o Tāmaki Makaurau.

Ataata: Whai Maia Trust 1 Ltd

He whakapapa mō Te Kawau

I te 30 o Noema 1866, ka tae atu a Apihai Te Kawau ki te Kōti Whenua Māori i te tiriti o Princes i te tāone nui o Tāmaki Makaurau. Ka takina e ia ōna whakapapa, pānga ā-iwi, me ngā take e noho nei ko ia te rangatira nui o Tāmaki Makaurau. Ka kī ia:

'Ko Tarahawaiki tōku matua. Ko tōna matua ko Tuperiri, ko te hapū o Tuperiri ko Te Taoū. I whānau ahau ki Ihumātao, nō Te Waiohua te whenua i tōku whānautanga. He Te Taoū a Tarahawaiki. Ko te ingoa o ngā tāngata i noho mai i te Waitematā ki te Manukau, ko Waiohua me Ngā Iwi. He mea āki a Te Taoū e Waiohua kia tae mai ki konei. Arā, ko te kōhuru ki Waitūoro, ka ngakia taua mate e Wahaakiaki, he Te Taoū hoki ia. Ko ngā tāngata i noho ki Kohimarama, ki Ōrākei, me Taurarua anō hoki, he mea patu e Te Taoū. He Ngā Iwi, he Waiohua rātou. Ko ngā pā o reira, he mea raupatu te katoa e Te Taoū. Nā Tuperiri te pā whakamutunga i raupatu. Nō ngā tau o Tuperiri, ka haere mai a Te Taoū. Ka tae ki Maungakiekie, ka whakatū i tētahi pā. Ko te Taoū noa iho i noho ki tēnei taha o Tāmaki.'
 
 

E rangahau tonu ana a Ngāti Whātua Ōrākei i ā rātou hītoria. He mea mahi ēnei whakaputanga ki ngā mātauranga kei a rātou i te wā nei.

He mea whakaputa tēnei rauemi matihiko i te tau 2021 e Ngāti Whātua Ōrākei me Te Manatū Taonga.

© Ngāti Whātua Ōrākei 2021.

Māori