Skip to main content
Logo: Te Ara - The Online Encyclopedia of New Zealand. Print all pages now.

Hinerangi, Sophia

by Jenifer Curnow

Biography

Ko tētahi o ngā īngoa kārangaranga o Sophia Hinerangi ko Te Paea (Tepaea). Ko ia te kaiārahi pekepoho o ngā tūruhi ki ngā tūāpapa o Ō-tū-kapua-rangi me Te Tarata i te moana o Rotomahana i mua i te hūnga o Tarawera Maunga i te tau 1886. Nō muri mai i te hūnga ka haere ia ki Te Whakarewarewa kaiārahi ai. Nā tana mahi kaiārahi i hau ai te rongo o Guide Sophia ki te takiwā o Rotorua i tōna wā.

He tamāhine ia nā Kōtiro Hinerangi rāua ko Alexander Grey (Gray), ā, ko te whakaaro i whānau ia ki Kororāreka i ngā tau atu i 1830 ki 1834. E ai ki tētahi kōrero nō Ngāti Ruanui o Taranaki te whaea, ā, ko te matua, ko tētahi parakimete, i tae mai i Aberdeen i Kōterani ki Pēwhairangi (Bay of Islands) i te tau 1827. Nō te 4 o Ākuhata 1839 ka iriiria a ia ko Mary Sophia Gray e Te Wiremu (William Williams) i Kororāreka. E ai ki ngā kōrero nā Charlotte Kemp a ia i whakatipu i te teihana mīhana i Kerikeri, ā, taro ake, tērā pea i kuraina a ia i te kura a te Rōpū Māori Wēteriana i te wāhi o Ākarana e kīia nei ko Te Tātua (Three Kings).

He iti nei ngā kōrero e mōhiotia ana mō te mārena tuatahi o Te Paea. Ko te whakaaro nō te tau 1851 i moe ai ia i tētahi tangata o Te Tai Tokerau; ko te īngoa kei ngā pukapuka ko Koroneho (Colenso) Tehakiroe. E ai ki ngā kōrero 14 ā rāua tamariki. Ko Hōri Taiāwhio te tāne o tōna moumouranga tuarua, ā, hei tā ētahi kōrero, ka moe rāua i te tau 1870. Nō reira tō rāua haeretanga ake ki Te Wairoa ki Tarawera Moana. Tokotoru ngā tamariki i puta ki te tangohanga tuarua.

Mō ngā tau 16 i mua i te hūnga o Tarawera a Te Paea e mahi ana hei kaiārahi i ngā tūāpapa o Ō-tū-kapua-rangi me Te Tarata. He wahine i akona paitia, ā, he reorua anō hoki. Ko tāna he whakahaere i ngā hāereere o ngā rōpū tūruhi, he tuku tohutohu ki ngā manuhiri, he whakatau i ngā kaute, he whakahaere i ērā atu o ngā kaimahi. He kaiārahi, he kairapu whakaaro, he hoa hoki ia ki te mano tini o ngā tūruhi i waimarie kia whiwhi ki ōna ratonga. I kī pēnei te whakaatu mai mōna a tētahi o tōna wā, arā, he tau te whakatupu, he ātaahua te whakatauiratanga o te kanohi, kāore i pērā rawa te kapi o ngā ngutu i te moko, he pokere, he rahi ngā mata, mātotoru ana te pōī o ōna makawe kenehuru, mōhinuhinu hoki, ā, he rōreka. Nā ngā tini whakaahua ōna me tētahi waituhi a C. F. Goldie i whakaatu mai te waiwaiā o tōna āhua.

Anō ki tētahi whakaatu mai a Te Paea, i ngā rangi 11 i mua o te hū, ka kite ia i tētahi mea rerekē, arā, e piki haere ana te wai o te roto, ā, i kite anō hoki ia i tētahi waka mariko. I te kitenga tuatahitanga he iti te waka me tōna kaihoe kotahi, kātahi ka rahi haere te waka, ā, kua eke te tatau o ngā kaihoe ki te 13, ēngari he māhunga kurī katoa. Kātahi ka eti haere nā, ā ngaro noa. Nā ēnei matakite āna i taea ai e ia te tohu o te mutunga o āna mahi kaiārahi i Rotomahana. I te pō o te 10 o Hune 1886, arā, i te pō o te hū, e 62 ngā tāngata i whakaruruhia e Te Paea i tōna whare i Te Wairoa. Nā te aupiki o te hoahoa me te mārohi o ngā pakitara i tāpiritia atu he papa anō hei whakakaha, i tū tonu ai tōna whare ahakoa te whānui o te whakangaromanga, kāore i pērā i ētahi atu o ngā whare i reira.

Nō muri mai i te hū ka nuku a Te Paea ki Te Whakarewarewa ki reira mahi ai i tana mahi kaiārahi. I te tau 1895 ka whakauru atu ia ki te kamupene whakaari, arā, ki te Land of the Moa Dramatic Company a George Leitch. I tū ia hei kaitapere mōna ake i te wā e tāpoi haeretia ana tēnei whakaari haraki i Ahitereiria. I noho ia hei tumuaki mō te peka o te Rōpū Turaki Waipiro o ngā Wāhine Karaitiana o Niu Tīreni (New Zealand Women's Christian Temperance Union) i Te Whakarewarewa i te tau 1896, ā, nō taua tau anō ka tohua a ia hei kaitiaki mō te whenua puia tāpui mō tētahi utu ā-tau iti nei. Ko Te Paea te kaiārahi i Te Whakarewarewa mō ētahi o ngā whare ariki o te ao.

Ko te 4 o Tīhema 1911 te rā i mate ai a Te Paea Hinerangi ki Te Whakarewarewa. Nōna ka tino kuia, nāna i whakahauhau ngā wāhine taiohi, ā, ka riro ko te mahi kaiārahi tūruhi hei mahi pārekareka, hei oranga mahi moni hoki mā te tini o te wā kāinga, arā, mā ngā wāhine o Tūhourangi. He tokomaha ngā uri o Te Paea, ā, e noho tonu ana ētahi i Te Whakarewarewa. He mea tapa he huarahi i Rotorua ko Sophia, hei whakamaumaharatanga ki a ia.


Hononga, rauemi nō waho

Ētahi whakaaro puaki, takenga

    Keam, R. F. Tarawera. Auckland, 1988

    Massy, E. I. The Tarawera eruption, 1886. London, 1903

    Masters, A. 'Three Rotorua portraits'. Auckland--Waikato Historical Journal No 43 (1983): 17--22

    'Sophia's story'. MS Papers 1208. Alexander Turnbull Library

    Stafford, D. M. The founding years in Rotorua. Rotorua, 1986

    Te Awekotuku, N. 'The sociocultural impact of tourism on the Te Arawa people of Rotorua, New Zealand'. DPhil thesis, Waikato, 1981


Me pēnei te tohu i te whārangi:

Jenifer Curnow. 'Hinerangi, Sophia', Dictionary of New Zealand Biography, first published in 1993, updated July, 2015. Te Ara - the Encyclopedia of New Zealand, https://teara.govt.nz/mi/biographies/2h37/hinerangi-sophia (accessed 17 June 2019)